7. august 2020

Hoydal og fake news

Sera ódámlig og óvirðilig framferð frá Høgna Hoydal!

Fyrst bar Høgni Hoydal rong tíðindi um fundin við Carlu Sands, ein fund, sum hann ikki tók lut í. Nú ber hann rong tíðindi um eina samrøðu í Kringvarpinum í gjár, eina samrøðu, sum allir føroyingar uttan trupulleika kunnu faktatjekka.

Her niðanfyri endurgevi eg 3 brot úr tí, ið veruliga varð sagt í Kringvarpinum, síðani tað, Høgni sigur varð sagt. Á hendan hátt kann tú sjálv(ur) døma trúvirði í tí, sum tjóðveldisformaðurin borðreiðir fyri okkum:

Dømi 1
Brotið úr samrøðuni í Kringvarpinum: “hon (Tine Bramsen) ringdi um nakað, sum hevur verið frammi í føroyskum miðlum fyrr, tað, at tey ynskja at seta  ein nýggjan radara upp á Sornfelli”

Høgni broyir tað til: “Landsstýrismaðurin fortaldi Føroya fólki, at danski verjumálaráðharrin, Tine Bramsen, hevði ringt til hansara í morgun og givið boð um, at Danmark fer at seta ein hernaðarligan radara upp í Føroyum”.

Her broytir Høgni Hoydal snildisliga ”ynski hennara” til at hon ”hevði givið boð”.

Dømi 2
Brotið úr samrøðuni í Kringvarpinum: ”men so nevndi hon, at….okur (føroyingar) fáa møguleika fyri at fáa upplýsingar burturúr honum (radaranum), og hon nevndi sjálv viðvíkjandi fiskarí, altso hvis tað var illgruni kanska um okkurt, sum ikki var í lagi, sum gekk fyri seg innanfyri fiskimarkið hjá okun”….

Hetta broyir Høgni til: ”Landsstýrismaðurin tóktist sera fegin um hesi harraboð úr Danmark. Hann segði seg millum annað hava spurt Tine Bramsen, um vit føroyingar ikki eisini onkuntíð kundu sleppa at síggja okkurt á hesum hernaðarliga radaranum – til dømis okkurt um fiskarí (!)”.

Her sigur Høgni Hoydal landsstýrismannin ”tykjast fegnan um hesi harraboð” (sum altso ongi boð vóru, men eitt ynski). Síðani reingir hann veruleikan og sigur, at landsstýrismaðurin ”segði seg millum annað hava spurt Tine Bramsen” hóast tíðindini klárt endurgóvu Tine Bramsen fyri sjálva at hava borið hetta fram.

Dømi 3
Tað, ið sagt var í samrøðuni við Kringvarpið: …”fyrst og fremst so skulu okur tosað um tað her heima í Føroyum. Je lurtaði eftir henni…. og segði henni at je fór at tosa við mítt politiska bakland í landsstýrinum og í løgtinginum og so fóru okur at tosa saman aftur”…

Hetta broyir Høgni til:  ”Men nú fegnast landsstýrið um, at Danmark aftur vil seta hernaðarradara upp í Føroyum”.

Her leggur hann landsstýrið undir at fegnast um radaran, hóast tað í samrøðuni greitt verður sagt, at eg als ikki havi tosað við landsstýrið og Løgingið, men fari at tosa við tey.

Sera ódámlig og óvirðilig framferð má sigast!

Jenis av Rana

mynd: ummr.fo

Tíðindi

8. oktober 2020
Flugan og fílurin
Burturúr hesum fekk tíðindamaðurin yvirskriftina “Hava frætt um svik við almennum pengum.”
14. september 2020
Samgongan eitt ár
Í dag er eitt ár síðan, at formenninir í Sambandsflokkinum, Fólkaflokkinum og Miðflokkinum undirskrivaðu samgonguskjalið.
4. september 2020
"Steffan skal lyfta arvin"
Kringvarpið gjørdi sending um Steffan Klein Poulsen, har Jenis av Rana og Jóhann Lutzen eisini luttóku.
3. september 2020
Tunlar norður um fjall – mest umráðandi at fáa nýggjar tunlar
Tilgongdin er ikki liðug enn, men nú er verulig gongd komin á málið.
30. august 2020
Jóhann Lützen fer skeivur - pornomálið kom til røttu tíðina
Pornomálið hevur verið sera aktuelt síðani internetið kom, og bleiv ikki minni aktuelt tá korona herjaði á heimin.