Munnligur fyrispurningur eftir § 52 í Tingskipanini

Spyrjari: Jenis av Rana, løgtingsmaður
Svarari: Sirið Stenberg landsstýriskvinna í almanna- og mentamálum
Evni: Málsviðgerðartíð av umsóknum um fyritíðarpensjón

Spurningar:
1. Hvussu long var málsviðgerðartíðin av fyritíðarpensjónsmálum í 2022?
2. Hvussu long er málsviðgerðartíðin av fyritíðarpensjónsmálum í 2023?
3. Hvat ger Almannaverkið, tá ikki er gjørligt at fáa (ser)læknaváttan innan ásettu
málsviðgerðartíðina?
4. Hvussu hevur Almannaverkið tryggjað, at málsviðgerðin er í samsvari við
galdandi løgtingslóg og dóm hjá Føroya Rætti?

Viðmerkingar:
Í 2012 samtykti Løgtingið broyting í § 32 í pensjónslógini, ið m.a. hevði við sær, at
játtanardagurin fyri fyritíðarpensjón fór frá at vera umsóknardagurin til í seinasta lagi
hin 1. í fjórða mánaðinum eftir, at Almannaverkið hevði móttikið umsókn um
fyritíðarpensjón. Grundgevingin fyri lógarbroytingini var at spara tí almenna pening
og at seta eina karensskipan í verk at forða fyri dupultveitingum.
Í vár varð dómur sagdur í Føroya Rætti, har Almannaverkið varð dømt
endurgjaldsskyldugt, tí málsviðgerðartíðin í fyritíðarpensjónsmáli hevði verið alt ov
drúgv. Dómurin staðfestir, at broytingin hjá Løgtinginum av játtanardegnum er ein
skerpandi umstøða í mun til at síggja til, at málsviðgerðartíðin er so stutt sum gjørligt.
Tá hetta sama mál í 2020 varð viðgjørt hjá Løgtingsins umboðsmanni, staðfesti
umboðsmaðurin, at tá Almannaverkið hevur eina avtalu við Serlæknafelag Føroya
um, at serlæknaváttan skal latast innan 8 vikur, hevur Almannaverkið skyldu at syrgja
fyri, at henda freist verður hildin – ella at skipa sínar arbeiðsgongdir soleiðis, at mál
kunnu avgreiðast, uttan at málsviðgerðin gerst óneyðuga drúgv.
Tað eru tó framvegis borgarar, ið hava søkt um fyritíðarpensjón í 2022, men enn ikki
fingið svar.
Fyri at fáa greiðu á, hvussu Almannaverkið hevur broytt málsviðgerð av
fyritíðarpensjónsumsóknum grundað á niðurstøðuna hjá Løgtingsins umboðsmanni og
dóminum hjá Føroya Rætti, verður hesin fyrispurningur settur landsstýriskvinnuni.

Á Løgtingi, 6. desember 2023
Jenis av Rana