Politikskt semja um kríggj Russlands móti Ukraina?
Jenis av Rana hevur sett munnligan fyrispurning til Løgmann.
Munnligur fyrispurningur eftir § 52 í Tingskipanini
Føroyskur ukrainapolitikkur
Spurningar:
1. Bendir nakað á, at landsstýrið fer at finna eina semju um ein føroyskan politikk mótvegis oyðandi kríggi Russlands móti Ukraina og fólki tess?
2. Hvussu kann, um so er, innihaldið í einum slíkum politikki hugsast at fara at verða.
3. Nær kann væntast, at ein slíkur politikkur sær dagsins ljós?
Viðmerkingar
«Hjálp elskaða ukrainska fólkinum á teirra friðarferð og lat ljósið frá páskunum breiða seg til russiska fólkið». Hetta segði Frans pávi millum annað í páskaprædiku sínari fyri umleið 100.000 fólkum á Pæturplássinum páskamorgun.
Skjótt eru 14 mánaðir farnir afturum, síðani Rusland eirinda- og miskunnarleyst legðist á ukrainsku grannatjóð sína við krígsmegi.
Uttan fyrilit eru í hesar 14 mánaðirnar menniskju í hundraðtúsundatali dripin. Heim, sjúkrahús, barnagarðar, samkomur, kirkjur- og skúlar í hundraðtali eru løgd í oyði. Sami miðvísi ágangur er framdur móti ídnaði, arbeiðsplássum, flogvøllum, vegakervi landsins- ja øllum, sum oyðileggjast kann.
Einki bendir á, at nakrar ætlanir eru um steðg. Tíverri hómast eingin friðarglotti.
Um minni enn tvær vikur eru 4 mánaðir farnir, síðani nýggja samgongan tók yvir føroyskan politikk. Sæð burtur frá uppskoti um at seta í verk donsk( EU) ríkislógartilmæli og samtykta uppskotinum um at játta 7 mió. kr. í humaniterari hjálp til Ukraina frættist enn lítið og einki um nakran miðvísan føroyskan ukrainapolitikk.
Tí verða hesir spurningar settir.
Á Løgtingi, 12. apríl 2023
Jenis av Rana