Portalurin fegnast um at Miðflokkurin stillar upp
Ingi Samuelsen skrivar soleiðis í Vikuskiftisblaðnum tann 8. oktober 2022:
Kjak. Gott fólkaræðisligt, virðisgrundað, politiskt kjak um, hvussu vit menna okkum víðari sum land og fólk er altíð sunt. Tí fegnast vit um, at Miðflokkurin er við í valstríðnum til fólkatingið hesaferð, tí hesin flokkur dugir sum ongin annar at lyfta kjakið upp á eitt áhugavert støði.
Men tað liggur ein andsøgn í at brúka tíð og orku upp á halda eitt valstríð uppi á kóki, har so grundleggjandi og týðandi politisk evni sum fígjar-, almanna-, mentanar-, umhvørvis-, fiskivinnu- og vinnupolitikkur osfr. ikki verða tikin við í kjakið yvirhøvur.
Tí er fólkatingsvalstríð í veruleikanum óáhugavert sum alt annað enn aðalroynd til komandi løgtingsval, sum onkur hevur kallað tað.
So mikið meira tápuligt er tað eisini, at taka alla løgtings- og landsstýrismanningina við í hetta stríðið – fólk, sum als ikki eru sinnað at koma á danating at sita, tí tey hava so nógv meira týdningarmiklar uppgávur at loysa heima í Føroyum.
Og so mikið enn meira tápuligt er tað, at hava 13 fólk og meira á listanum, tá tað hægst verður ein valdur fyri hvønn flokk. Vit hava nevnt tað fyrr á hesum stað – tíverri tykist boðskapurin ikki at hava vunnið frama.
Fólkatingsumboðanin er jú ikki annað enn júst umboðan. Eitt umboð fyri føroysku tjóðina, valt av fólkinum, sum verður sent avstað fyri ikki at føra politikk í danska tinginum.
Føroyskur politiskkur er jú nakað, sum vit avgreiða heima í Føroyum.