Í fleiri viðurskiftum standa rættindi hjá vaksnum fólki í vegin fyri rættindum hjá børnum og ungum. Miðflokkurin vil í øllum politikki taka barna- og ungdómsrættindi fram um rættindi hjá vaksnum. Í hesi tvístøðu eru børn og ung tey veiku, sæð í mun til vaksin.

Eitt dømi um hetta er rúsdrekkapolitikkur. Nógv vaksin ynskja fría rúsdrekkasølu, tí tað er teirra simpli rættur. Tey halda, at ongin skal ráða yvir, hvussu tey liva sítt lív, og tí skal heldur ongin blanda seg í teirra drykkivanar. Og hesi sjónarmið hava vunnið frama í Danmark so mikið, at har er frí atgongd til rúsdrekka á øllum hillum í øllum handlum kring alt landið.

Men júst hesin rætturin ger seg ógvusliga inn á børn og ung. Tí børn og ung verða uppvand við, at rúsdrekka er ein gerandisvøra og harvið ósagt eisini vandaleys. Men rúsdrekka er ikki gerandisvøra og er ikki vandaleys. Tí verður uppfatanin hjá børnum og ungum í Danmark sera liberal og óansin. Hetta elvir sjálvsagt til, at danir eru stórbrúkarar av rúsdrekka og drekka næstan tvífalt so nógvar litrar av alkoholi fyri hvønn borgara sum føroyingar og munandi meiri enn aðrir norðbúgvar.

Miðflokkurin ynskir, at eitt føroyskt fólkatingsumboð tekur spurningin upp á Fólkatingi. Tí danskur rúsdrekkapolitikkur er ein støðug avbjóðing fyri føroyskan rúsdrekkapolitikk.

Uppgávan hjá einum føroyskum fólkatingslimi er at vera virkin í lógarsmíði á Fólkatingi, sum gagnar føroyingum í Danmark, føroyingum í Føroyum og eisini danska samfelagnum sum heild.

Bill Justinussen
valevni fyri Miðflokkin til fólkatingsvalið